>>>>>> མ་འོངས་ཕུགས་འདུན་ཕྱོགས་བསྒྲིགས་དང་པོ།
ཉེ་བའི་ལོ་ཁ་ཤས་ཀྱི་རིང་ལ། ང་ཚོའི་ཕ་མེས་ཡང་མེས་ནས་བརྒྱུད་པའི་རོང་འབྲོག་གི་ཞིང་ཕྱུགས་ལས་གཉེར་སྟངས་གཙོ་བོར་གྱུར་བའི་སྲོལ་རྒྱུན་གྱི་འཚོ་བ་སྐྱེལ་སྟངས་ལ་འཕོ་འགྱུར་ཆེན་པོ་འགྲོ་བཞིན་པ་དང་། ང་ཚོའི་འཚོ་གནས་ལ་གཞུང་གི་སྲིད་ཇུས་དང་ཕྱིའི་དཔལ་འབྱོར་གྱི་གནོན་ཤུགས་ཆེན་པོ་ཕོག་བཞིན་ཡོད། གནོན་ཤུགས་འདི་དག་ནི་གློ་བུར་རྐྱེན་མེད་དུ་བྱུང་བ་ཞིག་མ་ཡིན་པར་གཞུང་གི་སྲིད་ཇུས་རྒྱ་ཆེན་པོའི་ཉེར་ལེན་ལ་བརྟེན་ནས་བྱུང་བ་ཞིག་ཡིན་པ་མངོན་གསལ་དུ་སྣང་ཞིང་། སྲིད་ཇུས་འདི་དག་གིས་འཆར་གཞི་དང་སྒྲིག་འཛུགས་ལྡན་པའི་ངང་ང་ཚོའི་རང་ཡུལ་གྱི་དཔལ་འབྱོར་སྒྲིག་གཞི་ལ་གཏོར་བརླག་དང་འགྱུར་བ་བཏང་ནས་བོད་མི་རྣམས་ཀྱི་འཚོ་བ་སྐྱེལ་སྟངས་གཞན་བརྟེན་ཅན་ལ་བསྒྱུར་བས། ད་ལྟ་ང་ཚོའི་བོད་ཀྱི་ཁྱིམ་ཚང་མང་པོས་ཉིན་ལྟར་མཁོ་བའི་འཚོ་བའི་རྒྱུ་ཆ་དག་རྒྱ་ནག་གི་ཚོང་ཁང་ལ་མ་བརྟེན་ཚེ་རང་རྐྱ་འཕེར་བའི་ངང་འཚོ་བ་སྐྱེལ་ཐབས་མེད་པར་གྱུར་འདུག འདི་ལྟར་རིམ་བཞིན་ང་ཚོའི་དཔལ་འབྱོར་གཞན་བརྟེན་ཅན་དུ་འགྱུར་རྒྱུའི་ཉེན་ཁ་ཤུགས་ཆེ་རུ་ཕྱིན་ཚེ། ང་ཚོས་དཔལ་འབྱོར་གྱི་ཐད་རང་སྟོབས་རང་སྤེལ་བྱ་རྒྱུའི་ནུས་ཤུགས་རང་བཞིན་གྱིས་ཉམས་དམས་སུ་འགྲོ་ངེས་པ་དང་། དེ་ལ་བརྟེན་ནས་ང་ཚོ་རང་ཉིད་ནུས་མེད་ཉམ་ཆུང་རང་ཁ་རང་གསོ་བྱེད་མི་ཐུབ་པའི་མི་རིགས་ཤིག་ཏུ་འགྱུར་ངེས།
ད་ལྟའི་དཔལ་འབྱོར་འགྲོ་ལུགས་འདིས་ཚད་རིམ་འདྲ་མིན་གྱི་ཐོག་ནས་བོད་མི་རྣམས་ཀྱི་དཔལ་འབྱོར་ལ་དོ་མི་སྙོམས་པའི་གཏོར་བརླག་ཚབས་ཆེན་བཏང་ཡོད། དེ་བས་དེང་སྐབས་བོད་མི་སྒེར་བའི་ངོས་ནས་ཟས་གོས་གནས་མལ་སོགས་དཔལ་འབྱོར་གྱི་མཐུན་རྐྱེན་ཡག་ཏུ་སོང་ཡོད་པ་ལྟར་སྣང་ནའང་། བོད་མི་སྤྱིའི་ཆ་ནས་མི་རིགས་ཀྱི་རིན་ཐང་ལྟ་བ་དང་། སྐད་དང་ཡི་གེ འཚོ་བའི་གོམས་གཤིས་སོགས་རང་གི་ངོ་བོ་མ་བརླག་པའི་ཐོག་ནས་ཡར་རྒྱས་འགྲོ་རྒྱུའི་ལམ་ཁ་ཡོངས་སུ་འགག་སྟེ། རྒྱ་ཆེ་ས་ནས་བོད་མིའི་སྲིད་འབྱོར་རིག་གསུམ་གྱི་ཁེ་དབང་དག་ཡོངས་སུ་ཤོར་བཞིན་འདུག
དེང་སྐབས་ང་ཚོའི་འཚོ་ཐབས་ལ་རང་སྟོབས་ཀྱི་འབད་བརྩོན་ལས་ཀྱང་ཚོང་རའི་རིན་གོང་མཐོ་དམའ་ཡི་འགྱུར་ལྡོག་དང་གཞུང་གི་སྲིད་ཇུས་ཀྱི་ཤུགས་རྐྱེན་ཐེབས་ཚད་ཆེ། སྤྱི་ལོ་༢༠༢༢་ལོའི་ཏོག་དབྱིབས་རིམས་ནད་ཀྱི་བཀག་སྡོམ་ལས་བྱུང་བའི་དཀའ་ངལ་ནི་དཔེ་མཚོན་གཙོ་བོ་ཞིག་རེད། སྐབས་དེར་བོད་ཀྱི་གྲོང་ཁྱེར་དང་འདུས་གྲོང་དག་ལ་ཟ་མ་ཆད་ཅིང་དཔལ་འབྱོར་གྱི་དཀའ་ངལ་བྱུང་ནས་ང་ཚོར་དཔལ་འབྱོར་རང་མགོ་རང་ཐོན་བྱ་དགོས་པ་དང་འཚོ་བ་རང་ཁ་རང་གསོ་བྱ་དགོས་པའི་སྐུལ་མ་དང་གསལ་འདེབས་བྱས་ཤིང་། མུ་མཐུད་ནས་གཞན་བརྟེན་གྱི་འཚོ་བ་སྐྱེལ་མི་འོས་པའི་ཉེན་བརྡ་བཏང་ཟིན།
བོད་མི་རིགས་ཀྱི་མ་འོངས་པའི་དཔལ་འབྱོར་ཡར་རྒྱས་གཏོང་དགོས་ན། ང་ཚོར་སྔར་ནས་ཡོད་པའི་ལག་ཤེས་བཟོ་ལས་སོགས་དང་འབྲེལ་བའི་ལག་རྩལ་གྱི་རྨང་གཞི་བརྟན་པོ་བྱས་ཤིང་། དེ་ལ་བརྩི་མཐོང་ཚད་ལྡན་ཡོད་པའི་ཐོག་ནས། བོད་ས་རང་ནས་དཔལ་འབྱོར་གྱི་ལམ་ཁ་གསར་གཏོད་བྱ་རྒྱུ་དང་དཔལ་འབྱོར་གྱི་ནུས་པའི་རྒྱུན་བསྲིངས་ཏེ་ཡར་རྒྱས་སུ་གཏོང་དགོས། ང་ཚོས་ཆེ་མཐོང་ཡོད་པ་དང་། ནུས་སྟོབས་ལྡན་པ། རྒྱུན་བསྲིང་ཐུབ་པ་བཅས་ཀྱི་ངོས་ནས་དེང་རབས་ཁྲོམ་རའི་དཔལ་འབྱོར་དོན་གཉེར་ལ་དཔུང་འཇུག་བྱས་ཏེ་ང་ཚོའི་མ་འོངས་བའི་ལམ་ཁ་བསྐྲུན་དགོས་ཤིང་། ང་ཚོའི་མ་འོངས་བ་ནི་གཤམ་གྱི་གནད་དོན་གཙོ་བོ་འདི་དག་ལ་རག་ལས་པར་སྙམ།
བོད་མིའི་བདེ་སྡུག་དང། བོད་ཀྱི་རིག་གནས་རྒྱུན་འཛིན། བོད་མིའི་མངའ་ཐང་བདག་དབང་། ཕ་མེས་ནས་བརྒྱུད་པའི་ས་ཆའི་བདག་དབང་སྲུང་འཛིན་བཅས་གཞི་ལ་བཞག་པའི་དཔལ་འབྱོར་གྱི་ལམ་ཁ་ཞིག་གསར་སྐྲུན་བྱས་ཏེ། བོད་མི་རྣམས་ལ་འཚོ་གནས་ཡར་རྒྱས་ཀྱི་གོ་སྐབས་མང་པོ་འཚོལ་རྒྱུ་དང་། བོད་ཀྱི་ཤེས་རིག་དུས་དང་མཐུན་པའི་ངང་རྒྱུན་འཛིན་དང་འཕེལ་རྒྱས་སུ་གཏོང་དགོས་ལ། དེ་ལྟར་བྱུང་ཚེ་ང་ཚོ་ཐུན་མོང་གི་འཚོ་གནས་ལམ་ཁ་མང་རུ་འགྲོ་ཞིང་། ཕྱི་རྐྱེན་གྱི་བཀག་རྒྱ་ལས་བརྒལ་ནས་རང་མགོ་རང་ཐོན་གྱི་དཔལ་འབྱོར་ནུས་པ་སྟོབས་དང་ལྡན་པ་ཞིག་སྐྲུན་ཐུབ།
རང་མགོ་རང་ཐོན་གྱི་དཔལ་འབྱོར་ལམ་ལུགས་ཤིག་འཛུགས་སྐྲུན་བྱེད་པར་ང་ཚོས་ངེས་པར་དུ་རང་བདག་གི་ངོས་ནས་རྒྱུ་ནོར་དོ་དམ་དང་གཉེར་སྐྱོང་བྱ་རྒྱུར་མཐོང་ཆེན་བྱ་རྒྱུ་དང་། དེ་དང་མཉམ་དུ་ང་ཚོས་རང་རྐྱ་འཕེར་བའི་དཔལ་འབྱོར་གྱི་རྨང་གཞི་བརྟན་པོ་འདིང་དགོས་ལ། འདིི་ལྟར་བྱས་ན་ང་ཚོ་རྒྱལ་ཁབ་ཀྱི་རོགས་དངུལ་གཅིག་པོར་བརྟེན་རྒྱུ་ཤུགས་ཆུང་རུ་འགྲོ་བ་དང་བོད་རང་གི་དངོས་ཡོད་གནས་སྟངས་གཞི་ལ་བཞག་པའི་དཔལ་འབྱོར་ལམ་ལུགས་ཤིག་འཛུགས་སྐྲུན་བྱ་ཐུབ་པ་གཤམ་གསལ་ལྟར་རོ།།
རང་མགོ་རང་ཐོན་གྱི་དཔལ་འབྱོར་ལམ་ལུགས་ཤིག་འཛུགས་སྐྲུན་བྱེད་པར་ང་ཚོས་ངེས་པར་དུ་རང་བདག་གི་ངོས་ནས་རྒྱུ་ནོར་དོ་དམ་དང་གཉེར་སྐྱོང་བྱ་རྒྱུར་མཐོང་ཆེན་བྱ་རྒྱུ་དང་། དེ་དང་མཉམ་དུ་ང་ཚོས་རང་རྐྱ་འཕེར་བའི་དཔལ་འབྱོར་གྱི་རྨང་གཞི་བརྟན་པོ་འདིང་དགོས་ལ། འདིི་ལྟར་བྱས་ན་ང་ཚོ་རྒྱལ་ཁབ་ཀྱི་རོགས་དངུལ་གཅིག་པོར་བརྟེན་རྒྱུ་ཤུགས་ཆུང་རུ་འགྲོ་བ་དང་བོད་རང་གི་དངོས་ཡོད་གནས་སྟངས་གཞི་ལ་བཞག་པའི་དཔལ་འབྱོར་ལམ་ལུགས་ཤིག་འཛུགས་སྐྲུན་བྱ་ཐུབ་པ་གཤམ་གསལ་ལྟར་རོ།།
བོད་པ་རང་གི་ཁེ་ལས་དང་མཉམ་འབྲེལ་ཁེ་ལས་ཡར་རྒྱས་གཏོང་རྒྱུ་དང་། བོད་ཀྱི་ཐུན་མིན་རིག་གནས་རྒྱུན་འཛིན། རང་བྱུང་ཐོན་ཁུངས་སྲུང་སྐྱོབ་བྱ་རྒྱུ་དང་འབྲེལ་ནས་དཔལ་འབྱོར་ནུས་ཤུགས་ཡར་རྒྱས་གཏོང་རྒྱུ།
ང་ཚོས་འདི་ལྟ་བུའི་དཔལ་འབྱོར་འཛུགས་སྐྲུན་གྱི་ལམ་ཁ་ཞིག་བརྒྱུད་ནས་ཁེ་ཚོང་སོགས་ལས་དོན་ཅི་ཞིག་ཡིན་རུང་འཕྲལ་ཕུགས་གཉིས་སུ་བོད་མི་ལ་ཕན་པ་ཞིག་དང་། བོད་ཀྱི་རིག་གཞུང་སྲུང་སྐྱོབ་བྱ་ཐུབ་པ། ང་ཚོའི་ཐོན་ཁུངས་ང་ཚོར་དབང་བ་དང་ང་ཚོའི་འཚོ་ཐབས་ཀྱི་ལམ་ཁ་ང་ཚོ་རང་ཉིད་ཀྱིས་བདམས་ཆོག་པ་ཞིག་བྱ་རྒྱུ་དེ་རེད། འདི་ནི་ང་ཚོའི་འཚོ་ཐབས་གཅིག་པུའི་ཆེད་དུ་མ་ཡིན་པར། མ་འོངས་པར་བོད་མི་རྣམས་ཀྱིས་རང་གི་ཐུན་མོང་མ་ཡིན་པའི་ཁྱད་ཆོས་མ་བོར་ཞིང་། རང་ས་རང་ཡུལ་དུ་རང་དབང་དང་བརྩི་མཐོང་ཡོད་པའི་སྒོ་ནས་བུ་རབས་ཚ་རྒྱུད་འཚོ་གནས་བྱ་ཐུབ་པའི་ཆེད་དུ་ཡིན་ནོ།
གཤམ་ཏུ་དེང་སྐབས་བོད་མི་རྣམས་ཀྱི་འཚོ་བའི་བརྟེན་ས་དང་དཔལ་འབྱོར་གྱི་ཡོངས་ཁུངས་གཙོ་བོར་གྱུར་བའི་ཞིང་ལས་དང་། དབྱར་རྩྭ་དགུན་འབུའི་ཚོང་ལས། ལག་ཤེས་ཐོན་རྫས། རང་བྱུང་ཁོར་ཡུག་དང་མཐུན་པའི་ཡུལ་སྐོར་སྤྲོ་འཆམ། འབྲོག་ལས་ཐོན་རྫས་སོགས་ཀྱི་སྐོར་ནས་ཞིབ་འཇུག་བྱས་ཡོད། ལས་རིགས་འདི་དག་གི་ཁྱབ་ཁོངས་སུ་ང་ཚོས་མུ་མཐུད་དུ་འཆར་གཞི་ལྡན་པའི་ངང་ཡར་རྒྱས་གཏོང་ཐུབ་སྟེ། ས་གནས་དང་འཚམ་པའི་ལག་རྩལ་བརྒྱུད་རྒྱུན་བསྲིང་ནས་ཞིང་ལས་འཕེལ་རྒྱས་གཏོང་ཐུབ་པ་དང་། དབྱར་རྩྭ་དགུན་འབུ་ཡང་བར་ཁེ་ཟ་མཁན་མེད་པའི་ཐོག་བོད་མི་རང་གིས་ཐད་ཀར་ལས་སྣོན་དང་ཚོང་སྒྱུར་བྱ་ཐུབ་ཚེ་ཚོང་གི་ཁེ་ཕན་མང་པོ་འཐོབ་ཐུབ་པ། བོད་ས་རང་གི་ལག་ཤེས་བཟོ་ལས་རྒྱ་བསྐྱེད་བྱ་ཐུབ་ཚེ་སྲོལ་རྒྱུན་རིག་རྒྱུན་འཛིན་བྱེད་པའི་ཞོར་དུ་ལས་ཞུགས་ཀྱི་གོ་སྐབས་ཡང་སྐྲུན་ཐུབ་པ། བོད་ཡུལ་ནི་ས་རྒྱ་ཆེ་ཞིང་རང་བྱུང་ཁོར་ཡུག་ལ་ཐུན་མོང་མ་ཡིན་པའི་ཁྱད་ཆོས་ལྡན་པས་ཡུལ་སྐོར་ལས་རིགས་གཉེར་རྒྱུའི་མཐུན་རྐྱེན་དང་གོ་སྐབས་མང་པོ་ཡོད་ལ། ཞིང་ལས་དང་འབྲོག་ལས་བརྒྱུད་ནས་བྱུང་བའི་མར་ཆུར་འོ་གསུམ་སོགས་ལ་ལས་སྣོན་གྱིས་ཚོང་རྫས་སུ་བསྒྱུར་ཐབས་ལ་འབད་རྒྱུ་ནི་ང་ཚོ་བོད་ཀྱི་དཔལ་འབྱོར་འདི་སྤྱིའི་ཆ་ནས་རང་མགོ་རང་ཐོན་་ཞིག་བྱ་ཐུབ་རྒྱུའི་ལམ་ཁ་གལ་ཆེན་དག་གོ།
བོད་ཀྱི་འབྲོག་ལས་དེང་རབས་ཅན།
| སྟོབས་ཤུགས། | ཞན་ཆ། | གོ་སྐབས། | ཉེན་ཁ། |
|---|---|---|---|
| སྐྱེ་བཅས་དང་ཚད་ལྡན་ངང་ཐོན་སྐྱེད་བྱས་པའི་འབྲོག་ལས་ཐོན་རྫས་ཡོད་པ། དཔེར་ན་འབྲི་འོ་དང་། ཤ། བལ་སོགས་ལྟ་བུ། | ལས་སྣོན་སྒྲིག་ཆས་དང་ཐོན་སྐྱེད་ལ་མཁོ་བའི་རྨང་གཞིའི་སྒྲིག་ཆས་ཚད་ལྡན་མེད་པ། | འཛམ་གླིང་ཡོངས་སུ་སྐྱེ་བཅས་དང་། ཉོ་ཚོང་འདྲ་མཉམ། རྒྱུན་བསྲིང་ཐོན་རྫ་ས་ཀྱི་དགོས་མཁོ་ཆེ་རུ་འགྲོ་བཞིན་པ། | འོ་བཟོས་ཟས་རིགས་བཟོ་ལས་ཅན་དང་། འཁེལ་འཐག་ལས་རིགས་འགྲན་རྩོད་ཅན་དུ་གྱུར་བ། |
| ཕུན་སུམ་ཚོགས་པའི་ཤུལ་བཞག་རིག་གནས་དང་། སྲོལ་རྒྱུན་གྱི་བཟོ་རྩལ། | ཐད་ཀར་རྒྱལ་སྤྱིའི་ཁྲོམ་རའི་ནང་ཚོང་འགྲེམས་བྱ་རྒྱུའི་གོ་སྐབས་མེད་པ། | ཐད་ཀར་འཛད་སྤྱོད་པར་ཕྱིར་འཚོང་བྱ་ཐུབ་པའི་དྲྭ་ལམ་ཚོང་གཉེར་གྱི་སྡིངས་ཆ་ཡོད་པ། | གནམ་གཤིས་འགྱུར་ལྡོག་གིས་འབྲོག་ལས་དང་ཕྱུགས་ཟོག་གི་བདེ་ཐང་ལ་ཤུགས་རྐྱེན་ཐེབས་པ། |
| ཕུན་སུམ་ཚོགས་པའི་ཤུལ་བཞག་རིག་གནས་དང་། སྲོལ་རྒྱུན་གྱི་བཟོ་རྩལ། | ཐད་ཀར་རྒྱལ་སྤྱིའི་ཁྲོམ་རའི་ནང་ཚོང་འགྲེམས་བྱ་རྒྱུའི་གོ་སྐབས་མེད་པ། | ཐད་ཀར་འཛད་སྤྱོད་པར་ཕྱིར་འཚོང་བྱ་ཐུབ་པའི་དྲྭ་ལམ་ཚོང་གཉེར་གྱི་སྡིངས་ཆ་ཡོད་པ། | གནམ་གཤིས་འགྱུར་ལྡོག་གིས་འབྲོག་ལས་དང་ཕྱུགས་ཟོག་གི་བདེ་ཐང་ལ་ཤུགས་རྐྱེན་ཐེབས་པ། |
| རྒྱུན་བསྲིང་ནུས་པ་དང་ཁོར་སྲུང་ལ་ཕན་པའི་ཐོན་སྐྱེད་བྱེད་ཐབས་ལྡན་པ། | ཐོན་སྐྱེད་ཀྱི་ཚད་ཉུང་བས་ཁྲོམ་ར་རྒྱ་ཆེན་པོར་ཁྱབ་ཐུབ་ཀྱི་མེད་པ། | བདེ་ཐང་ལ་ཕན་པའི་རྩྭ་སྨན་དང་སྨན་རྫས་ཀྱི་རིགས་ཀྱི་ཐོན་རྫས་ཁྲོམ་རའི་ནང་རྒྱུག་ཆེ་བ། | སྲིད་གཞུང་གིས་ཉོ་ཚོང་རང་དབང་ལ་ལྟ་རྟོག་ཚོད་འཛིན་བྱེད་བཞིན་པ། |
མ་རྒྱུ་དག་རིན་ཐང་ཅན་གྱི་ཐོན་རྫས་སུ་བསྒྱུར་རྒྱུ། **
ཚོང་ལས་ཀྱི་དམིགས་ཡུལ།
༡། ལས་སྣོན་བརྒྱུད་ནས་བོད་ཀྱི་འབྲོག་ལས་ཐོན་རྫས་ལ་དོ་སྣང་བྱེད་ཤུགས་ཆེ་རུ་གཏོང་རྒྱུ།
༢། མཉམ་འབྲེལ་འབྲེལ་ལམ་བཙུགས་ནས། ཉོ་ཚོང་འདྲ་མཉམ་དང་ཐུན་མོང་གིས་གྲོས་མོལ་བྱ་རྒྱུའི་ལམ་ཁ་འཛུགས་རྒྱུ།
༣། ཐད་ཀར་འཛད་སྤྱོད་པར་དམིགས་ནས་ཕྱིར་འཚོང་དང་། ཟོང་རྟགས་ཁྱབ་སྤེལ་བྱ་སའི་དྲྭ་རྒྱའི་སྡིངས་ཆ་སྐྲུན་རྒྱུ།
༤། ཕྱུགས་འཚོ་སྐྱོང་དང་ཁོར་སྲུང་གི་ལས་རིགས་རྒྱུན་བསྲིང་ཐུབ་པ།
༥། ཁེ་ལས་ཆུང་བའི་རིགས་བརྒྱུད་ནས་ས་གནས་ཀྱི་ལས་ཞུགས་དང་དཔལ་འབྱོར་སླར་གསོ་བྱ་རྒྱུ།
ཐབས་ལམ་གཙོ་བོ།
༡། རིན་སྤར།
ཀ༽ ཀོ་བ་དང་བལ་ཁུལ་གྱི་ཐོན་ལས།
- ཀོ་བ་ཀོ་རྐྱང་བྱས་ནས་མི་བཙོང་བར། ཀོ་བའི་སྟོད་གོས་དང་། ཀོ་ཁུག སྒོར་ཁུག ཟིན་དེབ་གཡོག་བྱེད། རྟ་སྒ་སོགས་སུ་ལས་སྣོན་བྱ་རྒྱུ།
- ལུག་པགས་ཀྱིས་དར་སྲོལ་ཅན་གྱི་ས་གདན་དང་། ལྭ་རིང་། བོད་ལྭ་སོགས་བཟོས་ནས་ཐོན་རྫས་གྲགས་ཅན་གྱི་ཁྲོམ་རར་སླེབས་ཐུབ་པ་བྱ་རྒྱུ།
- ནོར་ཁུལ་དང་ལུག་བལ་ལས་སྣོན་བྱས་ཏེ་དགུན་ལ་གྱོན་རྒྱུའི་ལག་ཤུབས་དང་རྐང་འབོབ་སྤུས་ལེགས་བཟོ་རྒྱུ།
ཁ༽ འོ་བཟོས་ཟས་རིགས་ཁྱབ་སྤེལ།
- ཕྱིར་འཚོང་ཁྲོམ་རར་དམིགས་ནས་འོ་བཟོས་ཟས་རིགས། མར་དང་ཆུར་བ། ཞོ་སོགས་ཀྱི་ཐོན་རྫས་སྤུས་ལེགས་བཟོ་རྒྱུ།
- ཤ་འཇོག་སའི་གྲང་མཛོད་ཚད་དང་ལྡན་པ་བཟོས་ནས། བོད་རང་སའི་སྐྱེ་བཅས་ཀྱི་སྐམ་ཤ་དང་ལུག་ཤ་ཕྱིར་འཚོང་བྱ་རྒྱུ།
ག༽ རྩྭ་སྨན་དང་སྨན་གྱི་ཐོན་རྫས།
- བོད་ཀྱི་སྨན་ཇ་དང་བྱུགས་སྣུམ།
- རྩི་ཤིང་རིགས་ཀྱི་སྨན་རྫས་དང་རང་བྱུང་གི་བཅོས་ཐབས།
- ཁོར་ཡུག་ལ་མི་གནོད་པའི་ཁམས་སྲུང་དང་པགས་གསོའི་ཐོན་རྫས།
ཁེ་ལས་ཀྱི་རྣམ་པ་གལ་ཆེན་འགའ།
གཅིག མ་རྩ་ཁེར་འཇོག་གི་ཁེ་ལས།
- མ་རྩ་འཇོག་མཁན་ནི་རང་བཞིན་གྱི་གང་ཟག་སྒེར་ཡིན་པ་དང་། བཞག་པའི་མ་རྩ་དང་རྒྱུ་ནོར་དེ་ཡང་གང་ཟག་དེ་ལ་དབང་ཞིང་། མ་རྩ་འཇོག་མཁན་གྱིས་རང་གི་སྒེར་གྱི་རྒྱུ་ནོར་ཡོད་དོ་ཅོག་གིས་ཁེ་ལས་ཀྱི་བུ་ལོན་དང་དོམ་འཇལ་བ་ལ་འགན་ཁུར་ཚད་བཀག་མེད་པ་ཁུར་དགོས་པའི་ཁེ་ལས་ལ་གོ ཁེ་ལས་འདི་རིགས་བོད་དུ་རྒྱ་ཆེ་བར་གནས་ཡོད། དཔེར་ན་གང་ཟག་སྒེར་གྱིས་བཟུང་བའི་ཟ་ཁང་དང་ཚོང་ཁང་ལ་སོགས་པ་ནི་ཁེ་ལས་འདི་རིགས་ཡིན་ཤས་ཆེ་བས། ཁེ་ལས་བ་མང་པོས་ཁེ་ལས་ཀྱི་རྣམ་པ་འདི་ལ་འགྲིས་གཤིབ་ཆེ། དེའི་དགེ་སྐྱོན་ནི་ཡོང་འབེབ་ཡོད་ན་རང་ཁོ་ནར་དབང་བ་དང་གྱོང་ཡོད་ན་རང་ཁོ་ནའི་ཁུར་དགོས་པ་ཞིག་ཡིན།
གཉིས། གྲོགས་སྡེབ་ཁེ་ལས།
- དེ་ནི་ལས་གྲོགས་གཉིས་སམ་གཉིས་ལས་མང་པ་དག་གིས་མཉམ་སྡེབ་ཀྱིས་མ་རྩ་བཞག་སྟེ་མཉམ་སྡེབ་ཀྱི་དོན་གཉེར་བྱེད་ཅིང་། མཉམ་སྡེབ་ལས་གྲོགས་རྣམས་ཀྱིས་གྲོགས་སྡེབ་ཁེ་ལས་ཀྱི་བུ་ལོན་དང་དོམ་འཇལ་བ་ལ་འགན་ཁུར་ཚད་མེད་ཁུར་དགོས་པའི་ཁེ་ལས། གྲོགས་པོ་དང་ངོ་ཤེས་རེ་ཟུང་གིས་ཁེ་སྤོག་གི་ཆེད་དུ་མཉམ་དུ་མ་རྩ་བཞག་སྟེ་བཙུགས་ཤིང་མཉམ་དུ་དོན་གཉེར་བྱས་ནས་་སྐྱིད་ཀྱི་རྟ་ཕོ་མཉམ་ཞོན་དང་སྡུག་གི་ཁུར་བོ་མཉམ་ཁུར་གྱི་ཁེ་ལས་ཤིག་ཡིན། ཁེ་ལས་ཀྱི་བུ་ལོན་དེ་ཡང་ཁེ་ལས་ཀྱིས་ཁུར་དགོས་པ་མ་ཟད། གལ་ཏེ་ཁེ་ལས་ལ་བུ་ལོན་འཇལ་བའི་ནུས་པ་མེད་ཚེ། མཉམ་སྡེབ་ཀྱིས་ཁེ་ལས་དོན་གཉེར་བྱེད་མཁན་དག་གིས་བུ་ལོན་འཇལ་ཚར་རག་བར་དུ་འགན་ཁུར་དགོས་པ་ནི་ཁེ་ལས་འདི་རིགས་ཀྱི་ཆ་རྐྱེན་ཡིན། མགྲོན་ཁང་དང་ཟ་ཁང་ཆེན་པོ་ལ་སོགས་པ་ནི་ཁེ་ལས་འདི་རིགས་ཀྱི་རྣམ་པའི་ཤུགས་ཆེ།
གསུམ། ཐུན་མོང་ལ་དབང་བའི་ཁེ་ལས།
- ཞིང་གྲོང་གི་ངལ་རྩོལ་མི་མང་ངེས་ཅན་ཞིག་གིས་མ་དངུལ་བཏོན་ཏེ་བཙུགས་པའི་ཁེ་གཉེར་གང་ཞིག་དེའི་རྒྱུ་ནོར་ངལ་རྩོལ་མི་མང་ཐུན་མོང་ལ་དབང་བ་དང་། མཉམ་དུ་ངལ་རྩོལ་བྱས་ཏེ་སོ་སོའི་ངལ་རྩོལ་ལྟར་ཡོང་འབེབ་བགོ་བཤའ་བྱེད་པའི་ཁེ་ལས་ལ་གོ་ཞིང་། དེ་ལ་དབྱེ་ན་ཞིང་བརྡལ་དང་ཡུལ་ཚོའི་ངལ་རྩོལ་མང་ཚོགས་ཐུན་མོང་ལ་དབང་བའི་ཁེ་ལས་བཅས་གཉིས་ཡོད། བོད་ཀྱི་རོང་འབྲོག་ས་ཁུལ་དུ་ཁེ་ལས་འདི་རིགས་མང་། དཔེར་ན་ཞིང་ལས་ཡོ་བྱད་འཕྲུལ་ཆས་ཚོང་ཁང་། ས་བོན་དང་ལུད་རྫས་ཚོང་ཁང་། མར་ཕྱུར་བཟོ་སྣོན་ལས་གྲྭ་དང་གོ་པགས་ལས་སྣོན་བཟོ་གྲྭ་ལྟ་བུ། ཁེ་ལས་འདི་རིགས་ཀྱི་ངོ་བོ་་ནི་རོང་འབྲོག་ས་ཁུལ་གྱི་ཁྱད་ཆོས་ལ་དམིགས་ཏེ་ངལ་རྩོལ་མི་མང་གིས་བཙུགས་པའི་འབྲོག་པ་དང་ཞིང་བར་ཐད་གར་དཔལ་འབྱོར་གྱི་ཕན་ཐོགས་ཡོད་པ་དེ་ཡིན། ད་བར་སྲིད་གཞུང་གིས་ཀྱང་ཁེ་ལས་འདི་རིགས་ལ་རོགས་དངུལ་སྤྲད་དེ་རྒྱབ་སྐྱོར་བྱེད་བཞིན་ཡོད་པས། དེར་ཡོད་པའི་མི་མང་གིས་རང་གི་ས་གནས་ཀྱི་ཁྱད་ཆོས་ལ་གཞིགས་ཏེ་ཁེ་ལས་འདི་རིགས་སྤེལ་ན་ཆོག
བཞི། མི་སྒེར་གྱི་ཁེ་ལས།
- དེ་ནི་གང་ཟག་གཅིག་གམ་ཁྱིམ་ཚང་གཅིག་གིས་འཛིན་སྐྱོང་ཚོང་གཉེར་གྱི་ཁེ་ལས་ཡིན། ཁེ་ལས་ཀྱི་བུ་ལོན་དང་དོམ་དེ་དག་མི་སྒེར་རམ་ཡང་ན་ཁྱིམ་ཚང་གི་རྒྱུ་ནོར་ཀྱིས་འཇལ་བའི་འགན་ཁུར་དགོས། ཁེ་ལས་འདི་རིགས་བོད་ཡུལ་དུ་མང་པོ་ཡོད་པས་མང་དུ་བརྗོད་མི་དགོས།
ལྔ་། ཞིང་པའི་མཉམ་ལས་ཁང་།
- ཞིང་པ་དག་གིས་རང་མོས་གྱིས་མཉམ་འབྲེལ་བྱས་ཏེ་དམངས་གཙོའི་དོ་དམ་ལ་བརྟེན་ནས་གྲུབ་པའི་ཕན་ཚུན་རོགས་རམ་རང་བཞིན་ཅན་གྱི་དཔལ་འབྱོར་རྩ་འཛུགས་ལ་གོ ཞིང་བའི་མཉམ་ལས་ཁང་འདི་ཡང་བོད་ཁུལ་དུ་མང་། དེ་ནི་རོང་འབྲོག་མི་མང་གི་ཐོན་བསྐྱེད་ལ་ཕན་པའི་ཁེ་ལས་ཤིག་ཡིན་པས་སྲིད་གཞུང་གིས་རོགས་དངུལ་སྤྲད་བཞིན་ཡོད། མགོ་ལོག་གི་རྒན་ར་རྒྱ་འཇིགས་མེད་རྒྱལ་མཚན་མཆོག་ནི་ཁེ་ལས་འདི་རིགས་དད་མོས་དང་ལག་བསྟར་བྱེད་མཁན་ཡིན་པས། ཁེ་ལས་འདི་རིགས་གཉེར་འདོད་ན་ཁོང་གི་གམ་དུ་བསླབ་བྱ་དང་ཉམས་མྱོང་སོགས་བླངས་ན་བཟང་།
>>>>>> དབྱར་རྩྭ་དགུན་འབུའི་ཚོང་ལས།
>>>>>> བོད་ཀྱི་ཞིང་ལས་དཔལ་འབྱོར།
>>>>>> བོད་ཀྱི་ལག་ཤེས་བཟོ་ལས། ཐོན་སྐྱེད་རྒྱ་བསྐྱེད་དང་རྒྱུན་སྲིང་།
